Jam 2 | BOJ | STEP | O ijo was qu, e qalieonum, niŋgi gago Tamo Koba Yesus Kristus agi laŋ qa iŋgi iŋgi kalil taqatejunu qaji a qa nuŋgo areqalo siŋgilateqnub. Nuŋgo areqalo dego deqa e na niŋgi endegsi merŋgwai. Niŋgi tamo ñam ti naŋgi kumbra bole bole enjroqnsib olo tamo laŋaj naŋgi qoreinjroqnaib.

James 2

Niŋgi na tamo kalil naŋgi kumbra qujai enjroqniye

1 O ijo was qu, e qalieonum, niŋgi gago Tamo Koba Yesus Kristus agi laŋ qa iŋgi iŋgi kalil taqatejunu qaji a qa nuŋgo areqalo siŋgilateqnub. Nuŋgo areqalo dego deqa e na niŋgi endegsi merŋgwai. Niŋgi tamo ñam ti naŋgi kumbra bole bole enjroqnsib olo tamo laŋaj naŋgi qoreinjroqnaib. 2 E na niŋgi degsi merŋgonum. Di kiyaqa? Niŋgi qudei kumbra uge endeg-yeqnub. Ñoro tamo bei a gara tulaŋ boledamu na walaosim baŋriŋ gol na gereiyo qaji di jigsim nuŋgo Qotei tal miligiq gilimqa niŋgi aqa ñam soqtosib a geregereiyosib minjibqa awo jaram boleq di awoqas. Ariya tamo bei iŋgi iŋgi saiqoji unu qaji a gara jigat braŋo jigsimqa a dego Qotei tal miligiq gilimqa niŋgi aqa ñam ugetosib minjqab, “Ni qalaq di tigelesoqne” o “Ni mandamq di awo.” 4 O was qu, niŋgi kumbra degyeqnub deqa niŋgi nuŋgo segi areqalo na tamo naŋgi laŋa peginjreqnub. Agi niŋgi tamo ñam ti naŋgi kumbra bole enjroqnsib olo tamo ñam saiqoji naŋgi kumbra uge enjreqnub. Nuŋgo areqalo uge dena niŋgi tamo naŋgi laŋa peginjreqnub. Niŋgi tamo kalil naŋgi turtnjroqnsib kumbra qujai enjroqnqab di kere.

5 O ijo was bole, niŋgi quiye. Qotei a tamo iŋgi iŋgi saiqoji unub qaji naŋgi qa osiqa giltnjrej. Yim naŋgi a qa naŋgo areqalo siŋgilaboletibqa a na naŋgi taqatnjrsim naŋgo Mandor Koba sqajqa deqa. Agi Qotei a nami endegsi marej, “Tamo uŋgasari e qalaqalaibeqnub qaji naŋgi e na taqatnjrsiy naŋgo Mandor Koba sqai.” Ariya mandam endeqaji tamo uŋgasari naŋgi mareqnub, “Tamo iŋgi iŋgi saiqoji unub qaji naŋgi tamo uge.” 6 O was qu, nuŋgo kumbra di uge. Niŋgi na tamo iŋgi iŋgi saiqoji unub qaji naŋgo ñam aguq ateqnub. Niŋgi are qaliye. Tamo yai naŋgi na niŋgi ugeugeiŋgoqnsib nuŋgo jejamuq di une eŋgoqnsib niŋgi joqoqnsib anjam pegiyo tamo naŋgo ulatamuq dia niŋgi tigeltŋgeqnub? Tamo silali koba ti unub qaji naŋgi segi na kumbra di yeqnub. 7 Qotei na aqa Ŋiri Kristus aqa ñam boledamu nuŋgoq di atej unu. Ariya tamo yai naŋgi na ñam di olo misiliŋyeqnub? Silali tamo naŋgi segi na degyeqnub.

8 Qotei a gago Mandor Koba unu. Aqa dal anjam bei nami endegsib neŋgreŋyeb unu, “Niŋgi nuŋgo segi jejamu gereiyeqnub dego kere nuŋgo was qu dego degsib gereinjroqniye.” O was qu, niŋgi dal anjam di dauryqab di niŋgi kumbra tulaŋ boledamu yqab. 9 Ariya niŋgi na tamo qudei naŋgi kumbra bole enjroqnsib olo tamo qudei naŋgi qoreinjreqnub di niŋgi une ateqnub. Deqa dal anjam dena niŋgi endegsi merŋgwas, “Niŋgi dal anjam gotraŋyonub.” 10 Tamo bei a dal anjam kalil dauryekritosim ariya qujai bole qujai grotqas di a dal anjam kalil grotekritqo. Deqa aqa jejamuq di gulube sqas. 11 Iga qalie, Qotei a nami dal anjam endegsi marej, “Ni was bei aqa uŋa jejamu ojetaim.” Osiqa dego marej, “Ni tamo bei qalsim moiotaim.” Bole, ni was bei aqa uŋa jejamu ojetosaieqnum. Ariya ni tamo bei qalsim moiotqam di ni dal anjam grotonum. 12 Niŋgi geregere endegsi poiŋgem. Qotei aqa dal anjam a gago une aqa siŋgila kobo-tetgwajqa deqa iga egej. Yim gago une na iga olo titgwasai. Qotei a dal anjam dena gago kumbra qa iga pegigwas. Deqa nuŋgo anjam maro ti nuŋgo kumbra ti di geregere taqatoqnsib Qotei aqa dal anjam aqa sorgomq di soqniye. 13 Tamo bei a tamo naŋgi qa dulqasai di mondoŋ tamo peginjro batiamqa Qotei a kamba tamo deqa dulqasai. Ariya tamo bei a tamo naŋgi qa dulqas di mondoŋ tamo peginjro batiamqa Qotei a tamo deqa kamba dulosim aqa une kobotetqas.

Tamo bei a kumbra bole bei babtqasai di iga kiersim qalieqom, a bole Kristus qa aqa areqalo siŋgilateqnu?

14 Es ijo was qu, tamo bei a mareqnu, “E Kristus qa ijo areqalo siŋgilateqnum.” A degsi maroqnsiq ariya a kumbra bole bei yala babtosaieqnu. Laŋa medabu na anjam mareqnu. Deqa tamo di Qotei na oqasai. 15 Kristen was bei a gara saiqoji o iŋgi saiqoji soqnimqa nuŋgo ambleq di was bei na minjqas, “Ni lawo na gilsim gara bei osim jigsim iŋgi uysim menetmim soqne.” A anjam segi laŋa minjqo deqa anjam dena kiersim a aqaryaiyqas? Keresai. 17 Dego kere iga Kristus qa gago areqalo siŋgilatosim ariya iga kumbra bole bei babtqasai di iga laŋa siŋgilatonum.

18 Ariya tamo bei a endegsi marqas, “Tamo qudei naŋgi Kristus qa naŋgo areqalo siŋgilateqnub. Ariya tamo qudei naŋgi olo kumbra bole bole yeqnub.” Degsi marimqa e na kamba minjqai, “Ni Kristus qa ino areqalo siŋgilatqa maronum. Ariya ni kumbra bole bei babtosaieqnum. Deqa e kiersiy qalieqai, ni Kristus qa ino areqalo siŋgilateqnum? E qalieqa keresai. Ariya e Kristus qa ijo areqalo siŋgilatoqnsiy kumbra bole dego turtsiy yoqnqai di ni e nubsim merbqam, ‘Bole, ni Kristus qa ino areqalo bole siŋgilateqnum.’” 19 Ni mareqnum, “Bole, Qotei a segi qujai unu.” Ni kere mareqnum. Ariya mondor uge naŋgi dego degsib maroqnsib Qotei ulaiyeqnub. 20 Ni nanari tamo. Ni mareqnum, “E Kristus qa ijo areqalo siŋgilateqnum.” Ni degsi maroqnsim ariya ni olo kumbra bole bei babtosaieqnum. Deqa ni laŋa medabu na mareqnum. Ni ijo anjam di aqa utru poimqo e? Ariya ni que. 21 Nami gago moma utru Abraham a na aqa aŋgro qujai Aisak osiq atra bijalq di atsiq Qotei atraiyej. Onaqa bati deqa Qotei a Abraham aqa kumbra di unsiqa minjej, “Ni ijo ŋamgalaq di tamo bole une saiqoji.” 22 Niŋgi are qaliye. Abraham a Qotei qa aqa areqalo siŋgilatosiq kumbra bole dego turtsiq yej. Aqa areqalo Qotei qa siŋgilatej qaji de ti aqa kumbra bole ti aiyeltsiq dauryej. Deqa iga endegsi marqom. Abraham aqa kumbra bole yej qaji dena aqa areqalo Qotei qa siŋgilatej qaji di taqyosiq siŋgilatej. 23 Agi Qotei aqa anjam bei nami endegsib neŋgreŋyeb unu, “Abraham a Qotei qa aqa areqalo siŋgilatej deqa Qotei na minjej, ‘Ni ijo ŋamgalaq di tamo bole une saiqoji.’” Osiqa Abraham kadoiyej. Anjam neŋgreŋyeb qaji di aqa damu agi brantej. 24 Deqa niŋgi qalieonub, tamo naŋgi Kristus qa naŋgo areqalo siŋgilatoqnsib kumbra bole dego turtsib yeqnub qaji naŋgi Qotei aqa ŋamgalaq di tamo bole une saiqoji unub. Ariya tamo naŋgi Kristus qa naŋgo areqalo siŋgilatosib olo kumbra bole bei babtqasai di naŋgi Qotei aqa ŋamgalaq di tamo bole sqasai.

25 Niŋgi sambala uŋa Rahap a qa dego are qaliye. Rahap aqa kumbra bole agiende. Josua a na tamo aiyel naŋgi qariŋnjrnaqa Jeriko qureq gilnabqa qure deqaji tamo naŋgi na tamo aiyel naŋgi di ñumqa laqnab Rahap na naŋgi aiyel ulitnjrsiqa gam bei osornjrnaqa naŋgi jeu tamo naŋgi alelnjrsibqa jaraieb. Rahap a kumbra bole di yej deqa a Qotei aqa ŋamgalaq di uŋa bole une saiqoji soqnej. 26 Iga qalie, tamo aqa jejamu a mondor ti sqasai di a moiqas. Dego kere tamo bei a Kristus qa aqa areqalo laŋa siŋgilatosim a olo kumbra bole bei babtqasai di a tamo moisiq aqa jejamu laŋa unu dego bul sqas.